TRASCURZO
NTRA no Mazziniano, no Garibaldino e no Bombiniano
Stevano tutt’e ttre dint’a
no cafè: lo Mazziniano Fumanno, lo Garibaldino
pigliannose no gelato, e lo Bombiniano leggenno
lo Giornale Afficiale. Lo Bombiniano se ferma de
leggere tutto nzieme, e ddice a ll’autre: Francisco
a Gajeta à fatto na protesta.
Garib. Poveretto,
si diverte a protestà.
Maz. Che ddice sta protesta?
Bom. Che isso dichiara a tutte
le ppotenzie che è n’usurpazione chella de
Garibaldi.
Garib. Usurpazione? À usurpato
isso lo sango de la povera gente, e lo sta usurpanno
à Gajeta.
Maz. Eh! a rregnà non è
la cosa cchiù facele; una perzona comme se
po’ spartere pe no regno, comme po’ abbadà
a ttanta cose?
Garib. Pe cchesto nce stanno le
Camere a Torino, e mmò nce starranno pe tutta
l’Italia; e quanno no Re è Galantommo se
trova sempe buono.
Bomb. Ma faciteme no piacere,
quanno tutto lo puopolo non bò a Francisco,
isso pecchè se stà ancora a Gajeta?
Garib. Se vò spassà
n’autro ppoco co nnuje.
Maz. Isso spera che ll’autre ppotenzie
se movessero pe lo defennere; ma non sape che tutte
quante ànno da penzà a li guaje lloro.
L’Italia s’è mmossa, l’Ungaria se stà
movenno, la stessa Capitale de ll’Austria non stà
cujeta, la Grecia se friccecheja: capite vuje ca
li puopole stanno araprenno l’uocchie e…
Bomb. Pe mme chillo stà
a Gajeta: gatto nce cova, mò à ordenata
pure la leva! Si uno non fosse certo de quacche
cosa non faciarria ste ppazzie! Ve credite che a
Nnapule stisso non nce stanno riazziunarie…uh! Avite
voglia… e po’ lo ppane và caro, ll’uoglio
pure, e apprimma jeva cchiù a buon mercato.
Lo popolo se lagna.
Maz. Vedite…
Garib. ‘A tuorto de se lagnà,
pecchè ntiempo de guerra non se po’ penzà
à ttanta cose; si non se ne và a ffa
squartà Bombino da Capua e da Gajeta non
potimmo stà alliere… Ma pe li vivere ntanto,
avasciarranno mò che benarrà lo Rre
nuosto Vittorio Emmanuele.
Bomb. Sperammo. Signò stateve
bbuone (ccànce perdo lo sciato).
Maz. Chill’ommo era na vera cocozza!
Garib. Io jurarria che era quacche
biecchio ispettore, che mmò s’à crisciuto
lo zimmaro.
Maz. Sia chi se vò,
io parlo sempe comme la sento: nfì a che
non se faciarrà justitia pe lo puopolo stesso,
non nce sarrà maje bene.
Garib. Vittorio Emmanuele e Garibaldi
songhe uommene da acconcià tutto e ddinto
a ppoco tiempo! Si nò non arresecarriano
la vita tanta figlie de mamma!
Maz. Io non boglio dicere chesto
ma …caspeta è ttardo: stateve buono ( co
chisto nce perdo lo tiempo, tene na capo cchiù
ttosta de no calavrese!)
Cafettiere. Oh! E ssì,
signorino mio bello,mmè so ntiso propeto
consolà; nce ll’avite cantata a tutte e dduje!
Garib. Li nfame che sò!
Chiste farriano cchiùmmale co la lengua,
che li surdate de Francisco coll’arme, si però
non fossero canosciute! Morte a li riazziunarie!
Viva sempre Garibaldi e lo Rre Galantommo!
Cafettiere. Viva pe cciento anne,
ca lo Cielo li ppozza benedì!
“
Lo cuorpo de Napole e lo Sebeto”, Napole, 22 ottobre
1860, pp. 278-279
